Kryetari i LDK-së, Isa Mustafa i është kthyer kritikave dhe akuzave për SHIK-un e duke e cilësuar një organizatë kriminale e financuar nga struktura të dyshimta dhe jo llogaridhënëse. Në një intervistë për Bota Sot, Mustafa ka thënë se kriminelet duhet të përgjigjen para ligjit.

"Kriminelët duhet të përgjigjen para ligjit. Një fjalë e urtë popullore thotë: Gjaku të zë, si duket disa nga ta kanë bërë veprime të rënda ndaj popullit dhe këto veprime nuk i lënë të qetë. SHIK-u ka qenë një strukturë ilegale për tërë këto vite që nuk i ka dhënë llogari askujt" ka thënë Mustafa.

Ministri i Arsimit, Shkencës dhe Teknologjisë, Ramë Buja, ka marrë vendim që javën e ardhshme të mos mbahet mësim në të gjitha shkollat fillore dhe të mesme në tërë territorin e Republikës së Kosovës.
 

Këtë vendim, të komunikuar përmes një komunikate për medie, ministri Buja e ka marrë për shkak të motit që po mbretëron në gjithë Kosovën, i cili ka vështirësuar në masë të madhe lëvizjen qytetarëve dhe paralajmërimit se edhe gjatë javës së ardhshme do të mbretërojë mot i ftohtë dhe me reshje.
 

“Duke qenë se informatat e vazhdueshme që MAShT-i i ka nga terreni, e që flasin për një gjendje tejet të vështirësuar të lëvizjes, është vendosur që mësimi të ndërpritet nga dita e hënë (6 shkurt) deri në ditën e premte (10 shkurt) në të gjitha shkollat fillore dhe të mesme në Kosovë”, thuhet në njoftim.
Ndryshe, mësimi, sipas MASHT-it, rifillon të hënën më 13 shkurt 2012 e gjithashtu ditën e humbura të mësimit do të kompensohen në fund të vitit shkollor. /zëri/

Idetë për ndarjen e Kosovës dhe për shkëmbimet e territoreve midis Kosovës dhe Serbisë, nuk ndalen. Ish-koordinatori i Paktit të Stabilitetit për Evropën Juglindore, Erhard Busek, në një prononcim për KTV-në, ka deklaruar se Prishtina dhe Beogradi duhet të nisin diskutimet për ndarjen. Ai thotë se kjo është zgjidhja më e mirë tash për tash dhe si shpërblim, Kosova do të njihej nga Serbia dhe nga pesë vendet e Bashkimit Evropian.

Pos ndarjes, ai përmend shkëmbimin e territoreve, Lugina e Preshevës t’i bashkohet Kosovës, e veriu i Kosovës Serbisë, për një zgjidhje të qëndrueshme në Ballkan. “Jam i bindur që në fund të fundit nëse asgjë nuk do të jetë e mundur, atëherë ndarja është zgjidhje”, ka deklaruar Busek. Ai ka folur edhe për bisedimet Kosovë-Serbi të ndërmjetësuara nga Bashkimi Evropian që sipas tij vetëm pas zgjedhjeve në Serbi do të krijohen kushte të favorshme për zhvillimin e bisedimeve. /koha/
 

‘Presion për shpërbërjen e strukturave paralele’

Një temë e rëndësishme e bisedimeve në takimin e NATO-s në Bruksel, ka qenë edhe misioni i KFOR në Kosovë. Aktualisht, NATO nuk parashikon një reduktim të trupave të KFOR-it për sigurinë në veri të Kosovës, por konsideron se zgjidhja më e mirë është politike dhe jo ushtarake.

“Ne mbështesim procesin e dialogut Prishtinë-Beograd me ndërmjetësimin e Bashkimit Evropian. Ne nuk duhet të habitemi, që një dialog i tillë të fillojë normalisht me çështje teknike të cilat duan një zgjidhje, dhe gradualisht këto bisedime teknike mund të kalojnë në dialog politik. Në eksperiencën time, kjo është e natyrshme”, ka theksuar Sekretari i Përgjithshëm i NATO, Anders Fogh Rasmussen.

Ndërkohë, pala shqiptare ka propozuar që të shtohet presioni nga komuniteti ndërkombëtar, lidhur me shpërbërjen e strukturave paralele në veri të Kosovës.

“Gjithashtu, komuniteti ndërkombëtar në përpjekje të gjetjes së një zgjidhjeje politike, duhet t’i kushtojë një vëmendje më të madhe lidhjeve të Beogradit me veriun e Kosovës. Pra, të përpiqet të bëjë një presion pozitiv, në kuptimin që situata politike dhe në përgjithësi situata në veri të përmirësohet”, ka deklaruar zëvendësministri shqiptar i Mbrojtjes, Arjan Starova. /Telegrafi/